2025 წლის 16-18 ივლისს გორის სახელმწიფო უნუვერსიტეტში საქართველოს კულტურის სამინისტროს ფინანსური მხარდაჭერით გაიმართა ხელოვნების მეოთხე საერთაშორისო ფესტივალი „მაჩაბელი“.
ფესტივალის ფარგლებში ჩატარდა სხვადასხვა ტიპის აქტივობები: მასტერკლასები, პრეზენტაციები, ფილმების პრემიერები, ფოტოგამოფენები. ამასთან ერთად, ფესტივალის ფარგლებში მოეწყო მიშო ვანიშვილის სახელობის ფოტოკონკურსი „ახალგაზრდა ხელოვანები მშვიდობისთვის“.

პირველი დღე:
ფესტივალის პირველ დღეს გაიმართა ანა კალანდაძის შემოქმედებისადმი მიძღვნილი კრებულის „ანას რვეული“-ს პრეზენტაცია. კრებულის წარდგენა მოხდა ავტორთა კოლექტივის მიერ იოსებ ჭუმბურიძის, ბადრი ვადაჭკორიას, ქეთი კალანდაძისა და კახაბერ რუსიძის შემადგენლობით, ხოლო ანა კალანდაძის ლექსებს კითხულობდა მსახიობი რუსუდან ბოლქვაძე.
აუდიტორიას შესაძლებლობა ჰქონდა გასცნობოდა პოლონელი ხელოვანების ვერონიკა ფილიჩისა და რაფალ ფორემსკის შემოქმედებას, რომელთაც ჩაატარეს მასტერკლასები გრაფიკულ დიზაინსა და ვიზუალურ ხელოვნებაზე.
მეორე დღე:
ფესტივალის მეორე დღე გაიხსნა თურქი ხელოვანის სელამი გუმუშის (ზებედაშვილი) პრეზენტაციით, რომელმაც შეკრებილ აუდიტორიას გააცნო საკუთარი ნამუშევრები, ქართული კალიგრამები და ადგილზე გამართა მასტერკლასი.
ფესტივალის შემდეგმა მონაწილემ ესპანეთიდან, ხოსე ლუის გომეს რამოსმა, ისაუბრა ესპანეთის კულტურის ოქროს ხანის შესახებ „ბალთაზარ გრაციანის ლიტერატურული სამყარო: „სიბრძნის ხელოვნებიდან აფორიზმების ინტერპრეტაციამდე“.
ფესტივალი გაგრძელდა ქართველი ხელოვანის ნინო ჩორგოლიანის მასტერკლასით გრაფიკულ დიზაინში, რომელმაც ადგილზე შექმნა რამდენიმე ნიმუში.
ფესტივალის მეორე დღე დასრულდა ტრაბზონის უნივერსიტეტის სახელმწიფო კონსერვატორიის სასცენო ხელოვნების დეპარტამენტის სტუდენტების სპექტაკლით - „მედეა. სიმღერა წყალზე“ – (ხელმძღვანელი: გამზე თანრივერმიში. მონაწილეები: მსახიობი ფატმანურ ჩელიქი. მუსიკალური გაფორმება: ტაჰა ქოჩე, ელიფ კარლიკლი, ჰილალ ბუკანი, გიზემ სოითემიზი).
ფესტივალის მეორე დღეს მონაწილეებმა მოინახულეს უფლისციხის ისტორიული მეზეუმ-ნაკრძალი, სადაც უნივერსიტეტის სტდენტებთან ერთად გამართეს მუსიკალური და თეატრალური პერფორმანსები.
მესამე დღე:
ფესტივალის მესამე დღეს გაიმართა რეჟისორ გიორგი ჭუმბურიძის მხატვრული ფილმის „შავი შაშვი ჩიოდაა“ პრემიერა, რომელიც ეძღვნება ანზორ ერქომაიშვილის შემოქმედებას. ფილმის ჩვენების შემდეგ რეჟისორმა ისაუბრა ფილმის შექმნის იდეასა და ისტორიაზე.
ამავე დღეს გაიმართა კიდევ ერთი მოკლემეტრაჟიანი ფილმის ჩვენება „თხოვნა“, რეჟისორი მერაბ ჩხაიძე. ემოციური ფილმის დასრულების შემდეგ რეჟისორმა ისაუბრა ფილმის შექმნის ისტორიასა და მთავარი როლის შემსრულებლის შესახებ.
ფესტივალის ბოლოს გაიმართა მოწვეული სპიკერის ჯეფრი სილვერმანის მასტერკლასი თემაზე „ომის ჟურნალისტიკა“.
ღონისძიების დასკვნითი ნაწილი დაეთმო ფესტივალის ფარგლებში მოწყობილ, მიშო ვანიშვილის სახელობის, ფოტოკონკურსს „ახალგაზრდა ხელოვანები მშვიდობისთვის“. ჟიურის წევრებმა გამოავლინეს კონკურსის გამარჯვებულები:
I ადგილი - ქეთევან გელაშვილი - სსიპ-გორის სახელმწიფო უნივერსიტეტი;
II ადგილი - გურამ კაკიაშვილი - სსიპ-გორის სახელმწიფო უნივერსიტეტი;
III ადგილი - ლევან სულთანიშვილი - სსიპ-გორის სახელმწიფო უნივერსიტეტი.

ხელოვნების საერთშორისო ფესტივალი „მაჩაბელი“ უკვე მეოთხედ განხორციელდა, რომლის ფარგლებში დაგეგმილ ღონისძიებებში აქტიურად იყვნენ ჩართულები უნივერსიტეტის სტუდენტები.