21 სექტემბერს გორის ციხეს ეწვივნენ უნივერსიტეტის რექტორი, პროფესორი გიორგი სოსიაშვილი, ჰუმანიტარულ მეცნიერებათა ფაკულტეტის დეკანი, ასოცირებული პროფესორი იოსებ ალიმბარაშვილი, პროფესორი ოთარ ჯანელიძე, მოწვეული დოქტორი ვახტანგ ინაური და ფაკულტეტის ქართული ფილოლოგიისა და ისტორიის სპეციალობის სწავლების პირველი წლის სტუდენტები, სადაც საქართველოს კულტურული მემკვიდრეობის ეროვნული სააგენტოს დაფინანსებით 2018 წლის 8 აგვისტოდან მიმდინარეობს ციხის სარეაბილიტაციო სამუშაოები და არქეოლოგიური გათხრები.
არქეოლოგიურ გათხრებს ხელმძღვანელობს ჰუმანიტარულ მეცნიერებათა ფაკულტეტის მოწვეული დოქტორი, არქეოლოგი გიორგი მინდიაშვილი.
სტუდენტებმა დაათვალიერეს ციხის შიდა ტერიტორიაზე გათხრების შედეგად აღმოჩენილი ქვატალახით ნაშენები და მრავალჯერადი გადაკეთების შენობების კვალი, დიდი ზომის ქვევრები, მოჭიქული ჭურჭელი, რომლებიც განვითარებული-გვიან ფეოდალური ხანით თარიღდება.
ციტადელში ასევე აღმოჩნდა წითლად შეღებილი კრამიტები და ალიზით ნაგები ციტადელის კვალი, რომელიც გვიან ანტიკური ხანას მიეკუთვნება.