2016 წლის 18 ნოემბერს, საქართველოს პარლამენტის ეროვნული ბიბლიოთეკაში, შპს „ჯეოკარიერ“-ის ორგანიზებით ჩატარდა საიტის - www.geocareer.ge-ს პრეზენტაცია.
შპს „ჯეოკარიერ“-ის მთავარი მისიაა დაეხმაროს როგორც დამსაქმებლებს, ასევე სამუშაოს მაძიებელ პირებს და ხელი შეუწყოს მათ პოზიტიურ თანამშრომლობას.
პრეზენტაციას დაესწრნენ დიასპორის საკითხებში საქართველოს სახელმწიფო მინისტრის, თურქეთისა და ირანის საკონსულოებისა და დიასპორების, გორის სახელმწიფო სასწავლო უნივერსიტეტის წარმომადგენლები, ბიზნესმენები საქართველოდან და თურქეთიდან.
დამსწრე საზოგადოებას სიტყვით მიმართა გორის სახელმწიფო სასწავლო უნივერსიტეტის რექტორმა პროფესორმა გიორგი სოსიაშვილმა. მან ხაზი გაუსვა თურქეთელი ქართველების როლს ჩვენი ქვეყნის განვითარების საქმეში, აგრეთვე, კონკრეტულ შემთხვევაში, კომპანიის „ჯეოკარიერ“ დამფუძნებლის-ქალბატონი ნერიმან ალბაირაქის (Neriman Albayrak) მოღვაწეობას.
ისტორიული სამხრეთ საქართველოს, ტაოს მკვიდრი, თურქეთის მოქალაქის ნერიმან ალბაირაქის მიზანია თავისი წვლილი შეიტანოს სამშობლოს, საქართველოს განვითარებაში. მისი მცდელობით და ორგანიზებით შეიქმნა დასაქმებაზე ორიენტირებული საიტი, რომელიც ხელს შეუწყობს ქართული შრომის ბაზრის განვითარებას და ახალგაზრდების, მათ შორის, კურსდამთავრებულთა ღირსეულ დასაქმებას.