მიმდინარე წლის 2 თებერვალს, გორის უნივერსიტეტის გიორგი მახარობლიძის სახელობის ლიტერატურული კაფე აქტიურად ჩაერთო ლიტერატურულ მარათონში და საინტერესოდ აღნიშნა წიგნის საჯაროდ კითხვის საერთაშორისო დღე.

დღევანდელი სტუმარი გახლდათ ამავე უნივერსიტეტის რექტორი, მწერალი გიორგი სოსიაშვილი.

როგორც საზოგადეობისათვის არის ცნობილი, წელს გიორგი სოსიაშვილი გახდა ლიტერატურული პრემია „საბას“ გამარჯვებული ნომინაციაში - წლის საუკეთესო პროზაული კრებული. საკონკურსოდ წარდგენილი იყო „ოთხი მოთხრობა“.

შეხვედრაზე ავტორმა ისაუბრა იმ ნიუანსებსა თუ მნიშვნელოვან ფაქტებზე, რომლებიც თან ახლდა წიგნის შექმნის პროცესს.
კრებულში შესულ ოთხივე მოთხრობას, მათთვის დამახასიათებელი სიუჟეტური და თემატური, თუნდაც პერსონაჟთა ინდივიდუალისტური მხატვრული სახეების განმასხვავებელი ასპექტების მიუხედავად, ერთი საერთო ნიშნით გამოარჩევს მკითხველი. ეს მათი ავტორის ხელწერაა - ბუნებრიობა!
მის შემოქმედებას განსაკუთრებულ ხიბლსა და კოლორიტულობას მატებს დიალექტური მეტყველება, რომელიც დამახასიათებელია ლიახვის ხეობის მკვიდრთათვის.
შეხვედრას ესწრებოდნენ სტუდენტები და საკითხით დაინტერესებული პირები, რომლებმაც შეკითხვები დაუსვეს ავტორს და გამოთქვეს საკუთარი მოსაზრებები გიორგი სოსიაშვილის შემოქმედებასთან დაკავშირებით.